أبراج اليوم

الحمل:

 

 أربط حذائك منيح اليوم، ودير بالك ما تكون كل الزرار مسوية. فبراير كله مشاكل إلك. حاول تتجنب المواقف المحرجة اللي ممكن تتعرضلها خصوصا بعد 15 الشهر (يعني لسة قدامك يوم). اللون المفضل لشالك هو الأحمر

 

الثور:

 

اليوم وانت رايح للسيارة في كلب صغير رح تتعرقل في، ما تنسى تسكر باب السيارة أول ما تركب عطول أحسن ما يفوت معك! ودير بالك تلاقي متخبي تحت كرسي من الكراسي. اذا في عندك مكنسة كهربا تخوفوا بكون أحسن وأحسن!

 

الجوزاء:

 

بتفكر تشتري عصفور بس خايف يعملك ربو.  اذا رح تطبخ اليوم دير بالك، كوعك يمكن يخبط بشغلة وانت بترش ملح. اليد اليسرى هي الأكثر حظا اليوم

 

 

السرطان:

 

وأخيرا بلشت تفهم راسك من رجلك في الشغل. مديرك رح يجيبك و يطلب منك مساعدة، استغل الموقف.

مصاري رح تجيك وانت ما بتستاهلها، انت وضميرك ترجعها ولا تشتري الميكرو ويف اللي نفسك في.

 

الأسد:

 

رياضة اليوجا اللي بتمارسها في البيت بلشت تأثر على اللي حواليك. الحركة اللي تعلمتها مبارح احتمال تفيدك اليوم.

توقع مندوبين مبيعات  يحاولوا يبيعوك عدة مطبخ و مكنسة ستائر. الحلوى المفضلة اليوم هي موس الشوكولاتة

 

 

العذراء:

 

ما تلبس قمصان فاتحة اليوم، في احتمال كبير تكب على حالك كتشب.

خليك منفتح للأفكار الجديدة خصوصا في حياتك الجنسية مع أخذ الحذر!

الرياضة المفضلة هي الإبحار.

 

الميزان:

 

اليوم انت عنيف جدا وهل الشغلة رح تصدمك. رح تقتل ذبابة أو حشرة مزعجة وهاي مش طبيعتك! بس اللحظة اللي تقتل فيها الذبابة بتذكرك ب Karate Kid   لما يمسك الذبابة بالأعواد الصينية.

استثمار عملته وانت مراهق بتسمع عنه أخبار سعيدة.

 

العقرب:

 

تجنب المعجنات خصوصا اذا رح تسخنها في البيت (مبين ليش)! واحد بالعيلة عمره كبير بفكرك فاقد الذاكرة طنشوا.

رح تشتهي الفلفل مع الأكل اليوم.

 

القوس:

 

القميص اللي لابسه اليوم ما رح يعجب الناس لأنه ذوقك غريب (في حدا بلبس بلوزة عليها قرد؟ خصوصا إنك يمكن تاكل موز اليوم).

عصفور يمكن يعملها عل الورق اللي لازم توقعوا مع احدى الشركات، تأكد إنه في كلينكس جنبك وانت بتوقع.

 

الجدي:

 

مفتش أسلحة فاضي أشغال من ال UN   رح ييجي عندك اليوم، غدّي حتى يشبع و خليه يفوت على كل الغرف.

الكتاب اللي بتقرأه اليوم بأثر على حياتك وبتفكر حالك عايش في ال Matrix .

حركات الكاراتيه اللي بتطبقها في الشارع بطيئة جدا!

 

الدلو:

 

ما تركب باصات بالليل، وما تروح الشغل أو البيت معصاحبك المجنون. لما تسوق السيارة اتطلع بالمرايا!

في الكلمات المتقاطعة اليوم في كلمة  بتطلع “القدس” ، يا انت يا حدا جنبك رح يكون بحل كلمات متقاطعة، ساعدو حرام.

رقم الحظ 47

 

الحوت:

 

مشاجرة على الفطور. حاول ما تكون متعصب لرأيك لأنه اللي قدامك ما رح يسكتلك.

في مكالمة طويلة و متعبة اليوم بس أبصر مع مين. بتحس حالك رجعت 10 سنين لورا خصوصا في المساء و بتحتار شو تلبس لما تطلع.